Toho do tutu.... sangkap ni Debata dang songon sangkap ni jolma. Pingkiran ni Debata dang songon na dibagasan pingkiran ni jolma. Sangkap, pingkiran, dohot dalan ni Debata tung dao do mamereng tu jolo, jala marproses do dibahen. Molo Debata mangalehon pasupasuNa tu sahalak jolma, — tu lomo ni rohana; ingkon jolo di uji jo, sahat tu na tang mamangke nanilehonNa i. Songon si topa hudon, ingkon jolo didegei do tano hudon i, sahat tu na dohot pinahanna dibahen mandegei, asa tung lamot, ipe asa ditopa. Dung sai dibalbali, huhut mambahen potonganna, jala asa sarupa tipisna dohot hapalna, baru pe asa ditutung
muse. Dungi dapot ma hudon na tipak, na boi marpangke. Songoni ma na masa tu si Josep.
Dung tubu si Josep, disangkap si Yakob ma asa mulak nasida, sude angka jolmana dohot ianakkonna tu tano Kanaan. Alai dung sahat tu tano Kanaan, tubu ma anggina si Benjamin, alai mate ma anggo si Rahel di tingki na manubuhon i. Jadi ditanom ma ibana di Bethel. Ido umbahen na humolong rohana di si Josep dohot si Benjamin. Sampulu opat taon ma dipangulahon si Josep tu Tulang na si Laban di Padang Aram, holan manghopkop si Rahel, asa boi topotonna. Jala dang manghirim be si Yakob na ingkon tubu si Josep i, ai tarhinsu do parbue ni bortian ni si Rahel.
,,A.... tarida ma huhut holong ni rohana di anakna, ai dipatongon ma jabu di nasida, ganup ripe sasada be. Olo tutu, — dihaholongi si Jakob do sude anakna na sampulu dua i, alai anggo si Josep dohot si Benjamin, i ma anak hasianna. Apala na humolong rohana di si Josep.
Mansai maol so mardingkan si Yakob mangasii nasida na dua, ala holan na dua i do nasa ina. Tung patar situtu do dipataridahon ibana dingkannai, — gumodang ma i tu si Josep. Ai bege ma!
Di na sahali di lehon si Yakob ma baju si sampurborna, apala nauli jala na ganjang tu si Josep.
Sala do i, lam sogo ma roha ni angka anakna na deba nari tu si Josep, — alani i. Ai nunga sogo hinan roha nasida mida ibana, ala sai dipaboa ibana angka hageduhon na niulaon ni hahana tu amangna.
Na jungkat do roha ni haha ni si Josep. Sai ditahi nasida do na so hasea mangarsahi amana dohot Debata, laos so diboto nasida do mandok mauliate tu Debata.
Asing ma tutu roha ni si Josep! Sai dilului rohana do hatigoran, ai na daulat marroha do ibana tu Debata.
Hape.... di na sadari, ro ma si Josep tu jolo ni angka hahana mandok: ,,Ua.... tangihon hamu ma nipingkon: Huipi, mangarahuti tibalan hita di tonga-tonga ni hauma. Jadi hehema tibalanku laos jongjong, jongjong be ma angka tibalan muna humaliang, laos marsomba tu tibalanku.”
Jadi muruk be ma hahana i mandok: ,,Ba,.... tung ho ma bangkit Raja, diroham mangarajai hami?” ,,O.... leaknion! Dang ditandaon dirina. Inangmu pe nunga mate, gabe ho ma muse naeng mangarajai hami?” ninna nasida.
Ba!.... beha bahenonku, ninna si Josep,.... sintong do songoni nipingki.
Hape, dang pigadan nari marnipi muse ma si Josep, jadi dipaboa ma muse tu amana, dohot tu hahana. Huipi.... ninna: ,,Mataniari, bulan dohot bintang sampulu sada marsomba tu ahu!”.
Alai dung dipaboa nipina i, hona hata ma ibana dibahen amana, gabe didok ma: ,,Nipi aha do nipimi?.... Dirimpu roham ahu dohot inangmu dohot haham, manungkap marsomba tuho?”
Jadi ro ma angka hahana didokma: ,,magigi hami mamereng ho, hurang ajar!.... tung unang ma hita dohot ibana mulaulaon, didalani ma dalanna. Heama songoni pangalaho ni anggi maradophon natoras dohot angka hahana?”
Dinasahali mesekesek ma si Josep mandapothon anggina si Benjamin ,,Tung mauliate situtu hudok, ala sirang ahu mulaulaon sian hahanta i, Ai manang aha pe hubahen burjungku, sai tong do dihosomi nasida ahu.”
Alai dinasahali ro ma muse na jumorbut aha ma i?.... Begema:
Didok si Yakob ma tu si Josep: ,,laho ma ho jolo maningkir angka haham. Nunga leleng dang tarida nasida. Asa tangkasi jolo manang beha do keadaan ni nasida, nang dohot angka pinahan naeng botoanku!”
,,Ba lehet amang,”.... laho pe ahu ninna si Josep.
Ditongan dalan pajumpang ma ibana dohot sada halak na manungkun ibana, mandok: ,,songon na maoraor pardalanmu amang, so datung nalilu hamu?”
,,Olo tutu!” ninna si Josep. ,,Disuru amanta do ahu mamereng angka dahahang, atik beha di ida hamu nasida?”
,,Olo tutu huboto do! Nunga munsat sian Sikem on nasida laho tu Dotan, jala tu si ma hamu laho!”
,,Ba, mauliate ma di hamu!” Dungi diihuthon si Josep ma hahana tu Dotan, jala pintor pajumpang ma ibana tutu dohot hahana i.
Sian na dao dope nunga di ida angka hahana ibana. E!.... bereng hita, nunga ro angginta si parnipi i, dipangke do muse baju-baju sisampurborna jala naganjang i, marhua ibana ulaning umbahen na ro? Naeng botoonna do pangalahonta asa adong husiphononna tu amanta?
,,A,.... bege”.... ninna sada sian nasida, huhut dipanghusiphon ma nangetnanget tu angka donganna, mandok: ,,Tapusa ma pangalualu i! Tole.... saroha ma hita!”
,,Tongka!” — ninna si Ruben! Unang ma hita bunu ibana! Tumagon ma ibana hita dabu tugodung na dihalongonan an.
Ima tutu!.... ninna nasida be.
Lam jonok ma si Josep,.... Jadi dung tolhas ibana tu jolo ni angka hahana, naeng jalanganna nasida nian, hape,.... tompu ma hehe nasida nasampulu i, ditangkup ma si Josep. Dibungka ma baju-baju si sampurborna i, disarat ma ibana naeng mandabuhon tu godung i.
,,Amang.... inang.... asi ma roham di ahu! Ompung!.... tudia boanonmuna ahu?”
,,Ee,.... sipho! Upani angka pangago do i, saonari jaloonmu ma upa ni nipimi.” Tole dabuma: ,,sada,.... dua,.... tolu,” ninna.
Didabu ma si Josep tu bagasan godung i, daga,.... jahat ni jolma, holan ala hasian dohot nipi dope, nunga naeng pusaonna ibana.
Jou-jou ma si Josep, huhut sai tangis ibana sian godung i. Jala sai mangangguhi mangido asiniroha, hape nunga ditadingkon angka hahana ibana.
Alai dung sae mangan nasida, laho ma si Ruben, ditinggalhon ma angka anggina i, dibaen ma hira naeng mangharingkothon pinahan, hape asa naeng enetonna do anggina i, paulahonna tu amana. ,,Au do sihahaan,” ninna dibagasan rohana. Tung ingkon marsapata tu ahu do ia mate si Josep. Pinaima ma jolo borngin, ninna rohana.
Tangis do si Josep di godung i. Ise ma paluahon ibana?.... Diuji do nian manjangkit tu ginjang, alai dang boi! Mansai bagas do godung i!
Manjou pe ibana, — gogo pe soarana, — tung dang adong manang ise umbege joujouna, ai dao do angka hahana, jala dang piga halak mamolus sian lambung ni godung i. Aha ma bahenonna?....
Dibereng si Josep ma dompak ginjang, jala tarida ma tutu na tiur saotik di awangawang. Disi do maringanan Debata na umboto saluhutna. Tangkas do diingot si Josep sude angka barita na pinaboa ni si Yakob taringot tu angka ompuna, nang taringot natorasna sandiri pe. Diurupi Debata do nasida sude! Da urupanna nang ibana? Jala.... Martangiang ma ibana.
Leleng dope angka anak ni si Yakob manghatahatai, dung sidung mangan, tompu ma dibereng nasida adong jolma na ro. Torop do unto nasida, ai partiga-tiga do huroha.
,,Ba,.... ise do na ro an?”
,,Ba, ise do tutu!” ninna be. ,,Pinompar ni si Ismail do huroha nasida, jala rupa saudagar i do na ro!”
,,Ido tutu!”
A,.... ninna si Juda: muruk pe taho hamuna tu ahu, dang sonang rohangku mida angginta i, ai mate ma annon ibana. Tagonan tagadis ibana tu halak Midian an, ai so adong labanta molo mate ibana dibagasan godung i, ninna.
,,I ma tutu!.... I ma tutu! Tagadis ma ibana.
,,Jou ba, — sotung salpu, deba ma hita mangenet si parnipi i. Ba, didia do tali? indiondo!.... dorasma da! unang salpu nasida.
Sautma tutu dienet si Josep sian godung i, digadis ma ibana tu halak Ismail i arga dua pulu rupia.
Songon pinahan do hape digadis na jahat i sada jolma. Hea ma i?
,,Tole, usung ma!.... unang huida hami be ibana!”
Mengkelengkel dope nasida manangkui hepeng si dua pulu rupia i. Tuani ma songoni pandok ni si Juda da, ninna nasahalak.
Ditiop halak naleban ima si Josep, ditali ma tanganna, laos di ingkathon ma ibana tu unta ni saudagar i.
,,Toe,” ninna, — ihuthon ma!
Daga!.... jahatnai! jorbutnai!.... songon pinahan do hape digadis nasida di Josep i tu halak Ismail i.
,,Inangoi amang!.... palua hamu ahu, asi ma roham di ahu! Ompung! Tutu amang.... anak ni na mora do ahu! Palua ma ahu, — asi roham!”
Hape,.... paula so dibege nasida do soara ni si Josep i. ,,Tole!” ninna.
Lam dao, — lam dao ma si Josep sian jabu ni amana. ,,Amangoi amang.... dang idaonku be natuatuangku dohot anggiku si Benjamin i, amang!.... dang idaon ku be nasida.”
Jadi dung borngin, laho ma si Ruben tu godung i, dungi jou-jouma ibana:
,,Josep!.... Josep!” ninna.
Alai dang adong alus sian godung i, lam dipagogo ma manjou: ,,Josep oi,.... Josep! Josep! Alusi!.... Bah! dang adong tarbege manang aha.
,,Inangoi, amang!.... nunga mate si Josep, ahu do anak siangkangan, ahu do mangalusi damang. Inang!.... aha ma dohononku tu natuatua i?....
Humalaput ma ibana mandapothon angka anggina, paboahon namasa i tu nasida. Hape.... disi ma tarboto naung digadis nasida si Josep tu pinompar ni si Ismail.
Tarsonggot ma ibana! ,,Tudia nama ahu, tudia nama ahu,” — laos diribahi ma ulosna.
,,A.... unang pola mandele ho, hahang! dang pola ho mangalusi amanta disi, ninna nadeba. Ida ma, nunga pola huseati hami hambing tunggal sada, guluhononnami ma baju ni si parnipi i, tu mudar ni hambing i, dungi tongoshononnami ma i tu amanta, asa unang disangka be hita taringot tusi.” ,,Beha,.... nunga sonang roham nuaeng! Alusi!”.... alai dang dialusi si Ruben be i, ai tung sogo situtu do rohana disi.
Sai dipaimaima si Yakob, hamumulak ni anakna si Josep i. Jotjot do laho ibana tu alaman manindo, hape,.... sai tarhirim do ibana, ai dang ro.
Alai dinasahali, — ro ma sada sian naposona mandok: ,,Atehe ompung.... tanda hamu do bajubaju on, manang bajubaju ni si Josep do on manang dang!”
Dungi pintor di tanda si Yakob do bajubaju ni si Josep. Mangangguhi ma ibana, huhut mandok: ,,Nunga disoro babiat ibana, nunga sun dipapangani!” Jadi, — dibahen ma ulos hori tu gontingna, sai tumatangis ma ibana ganup ari, marningot si Josep. Dungi, hehe ma sude anak ni si Yakob mangapuli ibana nian, dipaula ma nasida songon na marsak! A.... jungkatnai, jungkatnai!....
Alai anggo si Yakob dang olo apulon ni nasida, ninna ma: ,,Na laho manuruk tanoman ma ahu, mandapothon anakhi, dibahen arsak ni rohangku!....
Amang dangolnai!....
***
Tulisan ini adalah sebagian dari isi
Buku Hasudugan Ni Roha
Penasaran dengan kisah-kisah yang lainnya?
Baca Juga Kisah :
Tidak ada komentar:
Posting Komentar