Batak Revival: Si Josep Di Jolo Ni Raja Parao

Si Josep Di Jolo Ni Raja Parao
1 MUSA 41

Na nidok ni Debata ingkon saut. Molo balga manang godang parungkilon na niampehon ni Debata, — dang alani nasala, laos songoni ma muse balga ni las ni roha na laho sipasahatonna.

Ia Raja Parao, raja namora, nasangap jala natarbarita do. Mansai bidang do na ginomgomanna, jala torop angka na ni rajaanna. Sude pangisi ni tanona mangoloi parentana dibahen biar ni rohana; ai parhata sada do ibana.

Alai di na sahali.... marnipi ma ibana, pola dua hali di na saborngin i. Diipi ma, na jongjong ibana di topi ni pasir ni laut. Diida ma rungkar sian laut i, pitu lombu angka na mokmok, na laho tu panjampalan manggagati duhut-duhut. Dungi rungkar ma muse pitu lombu angka na marniang, jala didapothon ma angka lombu na mokmok i, pintor dipolgahi lombu na marniang i ma, angka lombu na mokmok ondeng, dang adong dibahen tading nanggo sada.

Ba,.... tarsunggul ma raja i, alai holan satongkin; ai manigor modom ibana muse, jala mangulahi marnipi! Ia nipina paduahon, suman do tu nipina parjolo. Diipi ma ruar sian laut i, pitu kambiur eme angka na porngis, alai sada do galana. Dungi ruar muse ma pitu kambiur eme na lambang, laos dipolgahi eme na lambang i ma eme na porngis i, tung suda dibahen sude!

Dungi tarsunggul ma ibana, jala diboto ma nipi do hape! Jadi dung torang ari, mansai marsak situtu do raja i, pasarisari nipina i! Aha ma na naeng masa nuaeng? ninna rohana. Na denggan!.... na roa?.... loja ibana pasarisari nipina i.

A, tole.... jou ma datu, angka paralamat na adong di tano Misir on, ninna panuturina.
Sigop bahen, unang susa pingkiran!

Jadi dung pungu nasida, dipaboa raja i ma nipi na nadua i tu nasida. Hape.... dang adong nanggo sada nasida na umboto manjujur nipi i. ,,Ba.... nunga mago musu,” ninna Raja i. Sai manjahai — manjahai do hamu di buku muna i, hape.... so marmusmus parbinotoan muna. ,,Dang diboto hamu manang aha!”.... gabe dipalao ma nasida sian jabuna, sian muruk ni rohana.

Sude ma pangisi ni jabuna mabiar mida raja i. ,,Amang, amang, amang!” ninna be. ,,Dia ma ulaning ujung ni on?” Daga.... nuaeng pe asa diingot sintua ni sitahu tuak anggur dosana maradophon si Josep! Jadi laho ma ibana tu adopan ni raja i, manaringothon si Josep i.

,,Ba.... santabi rajanami, gumanjang pe hatoranganhu sahalion, ujungna do berengon!” Bege hamu ma: Huboto do, ale rajanami, manang ise na boi patoranghon nipimuna i. — Si Josep, sada sian halak Heber na umbotosa; ai dipatorang do nipingku, dohot nipi ni sipauli sagu-sagu — andorang di hurungan dope hami. Jala.... saut do songon na nidokna i. Tung asi ma roham mangalap ibana, ale raja nami! Dokkon hamu ma mangalap ibana; ai pos do rohangku, botoonna do manjujur nipi muna i, manang songon dia pe pangalahona.

Jadi humalaput ma borhat angka oppas mangalap si Josep. — Tole!.... tole!.... ninna nasida mandok si Josep, ingkon tu jabu ni raja i ho. ,,Beha?”.... ninna si Josep, tu jabu ni raja i ahu? Ba.... marhua ma ahu tusi?”

,,A.... pahatop ma nian, ai na marnipi do raja i, jala diboto ho do manjujur nipi,” ninna halak.

Ba, — las do roha ni si Josep nian, alai atahe.... dang boi usungon baju sitrapan tu jolo ni raja nasangap i. Obuk dohot mise pe ganjang do.

,,A.... maila ahu laho tu jolo ni Raja i” ninna.

,,Molo boti ihuthon ma ahu — ninna induk ni hurungan i. Jala didokma manggunting obukna, dohot manabungi misena, dohot janggutna, jala disingkati ma dohot mangganti abitna, gabe songon jolma na imbaru ma ibana berengon. Ditogihon nasida ma ibana tu jolo ni raja Parao. Jala disungkun Raja i ma si Josep: ,,Ai hodo si Josep?.... atehe, tutu do diboto ho manjujur nipi?”

,,Dang ahu nian, ale Rajanami sijujur nipi.... Debata na dibanua ginjang do, na umbotosa saluhutna, ido sijujur nipi. Alai didok rohangku, sai paboaon ni Debata do na denggan tu hamu,” ninna.

Jala,.... dipajojor raja i ma nipina duansa. Dung sidung dihatahon nipina i, didok si Josep ma mandok raja i: ,,Sada do lapatan ni nipi nadua i, ai dipaboa Debata do tu Raja i, na naeng pamasaonna tu joloan on. Nauli do nipimuna nadua i, alai adong jorbutna.” Bege hamu ma: ,,Masa ma pitu taon bolon di sandok tanomuna, ihut tusi masa ma muse pitu taon haleon bolon. Angkup ni i, umbahen, napola dua hali marnipi raja i, paboa gomos ni boa-boa nasian Debata do.” Ipe.... didok raja i ma papunguon eme i, ditingki hadumaon, asa adong sipanganon ni jolma di angka taon haleon, unang mate so mangan pangisi ni tano on!”

Asa sude ma isi ni bagas ni Raja Parao, mangunduk-unduk, mangkatutuhonsa.

,,Ba.... tung tagamon ma, jumpang hita sada halak na songon ibana na ni inganan ni tondi ni Debata?” ninna raja i tu pangisi ni jabuna, — jala manigor putus ma dibagasan rohana, na ingkon si Josep nama raja paidua di sandok harajaonna, ai ibana do sada halak na pantas marroha jala na pistar. Dang tarhatahon be lasniroha ni si Josep, ai dung dibege sangkap ni roha ni raja i, ia manigor dibereng dompak ginjang, huhut mandok mauliate tu Debata, ala asi ni rohana.

,,A.... aut diboto damang ma nian na masa i, da ingkon ro ibana tu tano Misir on marlasniroha dohot iba!”

Dungi ditanggal raja Parao i ma tintin harajaon sian tanganna, disolukhon ma tu tangan ni si Josep i.

Dilehon muse ma sorta na bontar bahen abit dohot sampesampena, dibahen ma dohot horunghorung mas tu rungkungna, dipahundul ma ibana tu hureta paidua, jala disuru ma sada halak di jolo ni hureta i, mangaliati tano misir mantingtinghon: ai ingkon ganup halak mananda si Josep, hatoban ni halak Midian hian, gabe raja paidua di sandok tano Misir.

Dago.... hinauli ni hureta i, pola do dua hoda manogu-nogu huretana.

Inang!.... Inang!.... nunga pola marsinggang halak natorop, dibahen hasangapon ni raja Josep i. Alai dang pola dihaginjangkon ibana be angka i tutu, tangkas diboto si Josep nasian Debata do hasangaponnai, jala.... jot-jot dibereng ibana dompak ginjang, mandok mauliate tu Debata; ,,Urupi ma ahu, ale Tuhan asa manumpak tu na denggan sude ulaonku, ninna!”

***