Abraham

,,Ah.... tahe  susa ni namangolu on,” ninna si Abraham dibagasan rohana.

,,Godang ma tutu sipingkiran, taringot tu pargumulan pargulmiton ni na mangoluon. Ia molo so mardongan mohop ni ari, ba —  ngali ni ari, molo burju iba dang adong hasoan, ai torop halak naeng mangangkal-angkali, hape molo jengkel iba, torop halak marsogo ni roha. Molo padot iba di ulaon niba adong ma tutu allangon, alai ro ma angka si gurbak ulu, late ma rohana, di patubu-tubu ma hata mandok naso marlaok tu donganna. jala molo masa angka ulaon las ni roha, manang arsak ni roha, godang ma hata begeon: ,,dang marlaok si Abraham i, ai holan ulaonna do dipingkiri.” Sebalikna molo pinaihut-ihut nasida, torop ma tutu dongan niba, alai tading ma angka ulaon. Masa ma angka pandohan na mandok:  ,,Dia do tumagon mamora alai dang mardongan, pogos alai torop dongan?   “O.... Tuhan ajari ma ahu  marsaor dompak humaling hu, jala ajari ma ahu  mangulahon ulaonku si ganup ari.”


,,Alai tahe.... beha do ujung ni ngolungku?”.... anak so adong di ahu, boru pe so adong, daga.... dangol ni baoadi. Molo mate ahu — tudia ma angka artangku. Torop sisolhot mandok: ,,Bahen ma pesta, — somba hita ma debatani ompunta, asa dipasu-pasu ho.” Na deba nari mandok: boan ma jolo sipanganon dompak tulangmu anggiat dipasu-pasu ho, asa tubu anakmu.

Ba.... dia do tutu on, oloangku do?  Paliasmai.... paliasmai. Sabar do ahu  manaon songon dia pe pambahenan ni Debata namangolu i,  tu ahu.

Hape dinasahali dipangkulingi Debata ma si Abraham: ,,Bungkas ma ho sian tano hagodangan mu, dohot sian hatubuanmu dohot sian bagas ni amam tu tano si patuduhonongku tu ho!”

Jadi bungkas ma tutu si Abraham dohot jolmana si Sara i, dohot si Lot anak ni hahana i. — Tading ma tutu angka si solhotna, dohot angka  bangko-bangko, angka hasomalon hian.
,,Ba!.... Ise do angka na ro adui?” 

,,A,.... parmahan do i, bereng ma: Lombu dohot birubiru huida di alai!

Olo tutu,  alai dang parmahon boti, ida ma torop nai. A,.... longang rohangku disi da!....  Lam jumonok  ma nasida na ro i. Jumolo dua unto na hinundulan ni sada natuatua dohot jolmana. Mansai ganjang do baju-baju nasida;  ,,Ba,.... surta do huroha! Arga do ra! Namora do huroha nasida. Ida ma torop ni pinahannai: lombu, birubiru, halode, angka unto pe torop do. angka parmahan pe dang hurang.

Bereng ma huhut torop ni amaama, inaina dohot dakdanak pe  mangihut sian pudi. Naposo ni natuatua namora an do nasida saluhut na ulaning?....  ,,Hira na laho bungkas do nasida huroha, godang ni barang na ni usung ni nasida. Tole, tasungkun ma nasida, asa binoto!”
 
,,Atehe,.... na  lao tu dia do hamu, amang,.... na maporus nilele ni musu do hamu?” 

,,Ndang  na maporus hami, ale amang! Nabungkas do! Debata sandiri  marsuru hami bungkas sian tano hagodangan nami!” 

Oooo.... i do hape! Tudia ma didok Debata hamu bungkas?”

A,.... Anggo i  dang torang dope huboto hami; ai songon on do pandok ni Debata tu hami; ,,Bungkas ma ho sian tano hagodangan mu dohot sian hatubuanmu dohot sian bagas ni amam, tu tano sipatuduhon on ku tuho!”.... ninna.

,,Bo,.... asa dang diboto hamu dope tano sitopotonmuna?” ,,Beha, pos do rohamuna jala barani manadingkon angka sisolhotmu manopot luat dohot tano naso ni idamuna dope?” 

,,Ba,.... barani do hami; ai Debata sandiri do mandokkon tu hami! 

,,Bo,.... barani ni halak on,  dang huantusi i, amang!”  ,,Ise do goarmu tahe?”

,,Si Abraham do goarhu, — jala si Sara do goar ni inantai!”

,,Bo,.... hamu do hape si Abraham,  na tarbaritai?” Ba, hipas be ma hita, da!, anggiat ma hatop dipatongan Debata tu hamu tano na nidokkon na i!....

Dungi, dinutnuti si Abraham ma dalanna. Sai marlas ni roha do ibana na mardalan i, atik pe dao jala maol sipata dalan i; ai tangkas do binoto, pasauton ni Debata do bagabagana tu ibana. 

Dung leleng nasida mardalan, sahat ma nasida tu tano Kanaan. Dungi ro ma Debata manopot si Abraham, jala didok ma tu ibana: ,,Tu pinomparmu ma hulehon tano on!” Jadi, dung dibege si  Abraham hata i, di pajok ma disi sada langgatan laho mandok mauliate tu Debata. 

Lam matua ma si Abraham dohot si Sara. Nunga pola sampulu taon nasida dung sahat  tu tano na nilehon  ni Debata tu nasida. Hape,.... laos so dipasaut Debata dope Hatana tu si Abraham; ai laos so tubu do anakna.  Beha,.... lupa do Debata di bagabagana i? dia nama ujungna? Arta nasai godang di lehon Debata tu ibana. Ise nama manean arta i? susa ma pingkiranna tutu!  Alai tahe, guru di Debata do sude, jala dang adong naso tarpatupa Debata.
Hape di nasahali.... ro ma Debata  manopot ibana borngin.

,,Abraham!” ninna Debata. 

,,Dison do ahu, ale Tuhan!”

,,Beta ma!” ninna.... dungi ditogihon Tuhan i ma ibana tu balian. ,,Tailihon ma dompak langit, jala bilangi ma angka bintang i. Molo habilangan ho angka i, habilangan ho ma pinomparmu sogot!” ninna Debata. 

Jadi porsea ma si Abraham di hata ni Debata, gabe hatigoranna do i dietong Debata. Dipajongjong si Abraham ma angka jabuna di lambung ni sada tambak na balga. Disi ma dipaima ibana hasasaut ni bagabaga ni Debata; ai tangkas do diboto: Nasa na nidok ni Debata ingkon saut!
Dapatkan selengkapnya di BUKU HASUDUNGAN NI ROHA 



Tidak ada komentar:

Posting Komentar