Haroro Ni Angka Haha Ni Si Josep Tu Tano Misir
1 Musa 42
Ba!.... songon na leleng ma logo ni ari on, asing sian nabiasa. Biasana nian, sahali sabulan sai ingkon ro do udan. Hape.... anggo sahalion, nunga mandok adong dua bulan, alai dang ro udan. Molo rope udan, sae ma taptap baju, gabe mansegai tu angka suansuanan. Ai mangkaputik ma angka bunga ni hau, songoni dohot angka suansuanan. Pinahan pe nunga marsingkor, dohot angka mata ni mual nunga marsik.
,,Ba.... songon na golap arion, ombun pe di ginjang songon na dokdok, naeng ro ma udan ulaning? — Tuani ma, asa boi mangula hita.”
Hape.... sai pinaima.... tinatap gabe tungko, tinailihon gabe dan. Nunga adong manang piga bulan sahat tu nasataon, tong do songoni. Sipanganon nunga suda, sihirimon dang adong, ujungna masa ma haleon potir.
,,Tudia nama hita?” ninna angka anak ni si Jakob. Pasimpar pasebut ma sude jolma na di tano Kanaan, mangalului sipanganon.
Dagoi amang!.... tudia nama hita? Uhum ni Debata ma naro tu hita, asa unang neang roha ni jolma, molo tingki adong, dang dipingkiri ari marsogot, ninna halak natorop.
Dungi tarbortik ma tu anak ni si Jakob, di tano Misir adong do si gadis eme. ,,Beha bahenon borhat ma hita asa unang mate hita,” ninna anak ni si Jakob. Jadi borhat ma nasida tutu.
Alai, anggo di tano Misir, sungkup do sipanganon, ai nunga diungkap si Josep angka naposona laho manggadis eme tu halak natorop marguru tu ringkotna. Sude halak manghaholongi ibana, jala luhut na mandok: ,,Tuani ma si Josep gabe rajanta, ai ibana ma sipalua bangsonta.”
Ba.... songon huta na balga do idaon angka sopo natorop i, jala eme naung pinapunguna hira songon rihit na di topi laut, naso hasuhatan be dibahen ni godangna.
Alai di na sahali,.... diida si Josep ma, ro tu jolona sampulu halak, halak na asing sian tano na dao mangido eme. Pola manungkap nasida na sampulu i tu jolo ni si Josep.
,,Asi ma roham, ale rajanami!” ninna. ,,Gadis hamu ma tu hami eme; ai haleon potir do nuaeng ditanonami, tano Kanaan. Asi ma roham di hami, naposomon!”
,,Ba,.... ise do halak on?” ninna si Josep dibagasan rohana. Rupa dahahang do halak na sampulu on; gabe.... tarsonggot ma rohana, laos dipanotnoti ma nasida, lam tangkas ma ditanda, — nasida doi hape, jala.... tompu ma di ingot nipina i.
,,Amang.... amang, sintong do hape nipingki!”
Las do rohana nian marnida nasida, alai tahe.... ninna di bagasan rohana: ,,Hu uji ma jolo nasida manang naung dipauba rohana.” Dipaula si Josep ma tutu songon na muruk ibana, jala di sungkun ma nasida: ,,Ba, marhua hamu tuson?” ninna.
,,Naeng tuhoronnami eme ale rajanami! sian tano Kanaan do hami ro, jala na sinuru ni amanta natuatua i do hami!”
,,A.... dang tutu na nidok muna i, pangkahap do hamuna, na manjalahi handang naburak tu tano nami on!”
,,Tongka,— ale rajanami! na laho manuhor eme sambing do hami, angka naposomon. Haporseai hamu ma hatanami, — sampulu dua hinan do hami saama, tading di jolo ni amanta do anggo siampudan i, alai anggo nasada nari,— dang disi be!”
,,A.... ise ma manghaporseai hatamuna i, amang! Mulak ma jolo sada sian hamu mangalap anggimuna na tading i.
Molo ro dohot ibana, ba.... disi pe asa porsea ahu naso pangkahap hamu, alai tu hurungan ma hamu jolo.”
Dung tolu ari lelengna dihurungan nasida, ro ma si Josep tu nasida: ,,A.... boti ma binahen! sada sian hamu ma tading dison, jala nasia i ma jolo mamboan eme na tinuhormuna sian on. Dung pe diboan hamu sian i anggimuna i, asa huboto burju ni rohamuna.”
Jadi dung dibege nasida hata ni si Josep i, marsisolsolan ma nasida: ,,Iale inang! soro ni arinta on, pardosa do hita dompak angginta i, ai taida do unduk ni rohana i, andorang diparajarajai hita. hape.... dang tatangihon suara ni elek-elek na i. Alani i do umbahen na ro tu hita hagogotan on!”
,,Nda hudok hinan tu hamu: unang mardosa hamu tu angginta?” ninna si Ruben — ,,nunga mangonai sapata ni mudarna tu hita.”
Dirimpu nasida ma, dang diantausi si Josep angka na pinandok nasida i, hape.... apala saluhutna do diantusi. Ditundali ma nasida, laos tangis sosombopon.
Dungi ditopot si Josep ma nasida padua halihon, huhut mandok: ,,Ba.... tole, laho ma hamu sian i, unang sai ginanjangan hata,” — laos ditiop ma si Simeon di jolona.
Borhat ma nasida tutu dibagasan arsak ni roha. Digadis Raja i do nian eme sagoni be, alai tongtong do marsak roha nasida pasarisari na masa i.
,,Alai beha bahenon!.... anggiat olo amanta paborhathon dohot si Benjamin muse,” ninna nasida sama nasida. ,,Taida ma ujungna.”
Dung leleng nasida mardalan, jala sahat
tu parbornginan, diungkap sahalak ma gonina, laho mangalehon gagatan tu halodena. Hepe.... didapot ma perakna i, talpe di siboanonna.
,,Ba.... hea do i! Na beha do on di roha muna. Ida ma — laos dison do hepeng ki — Ise do mambahen ulaning?”
,,Amangoi amang! dohonon ni raja i ma annon: ,,Pangkahap do hamu!” Hape.... dang panangko hita.”
Sai didalani nasida ma dalanna, huhut di bagasan biar ni roha, alai dung sahat nasida tu tano Kanaan, dipaboa ma na masa i saluhut tu ama nasida si Jakob i. — Tung marsak do anggo roha ni si Jakob.
,,Tung na so oloanku paborhathonon dohot si Benjamin,” ninna.... ,,ai rupa halak na jahat do raja ni Misir i!”
,,A.... na parir ma ahu bahenonmuna,” ninna. — Si Josep nunga mate, si Simeon tarhurung, boanonmuna dope dohot si Benjamin, asa haro mago anakhi sude dirohamuna! I pe, — dang huloas ibana boanonmuna, tung sungkot ni hinalungun dohot hinaparir ma huta on dibahen hamu.”
Alai dung suda dipangan nasida, nabinonna na sian tano Misir i, tarpaksa nama borhat nasida musengani. Beha bahenon.... ingkon dipaborhat si Jakob ma dohot si Benjamin, boanon ni angka hahana tu tano Misir, — ai dang olo nasida borhat molo so dohot ibana. Jadi dung dihangkung si Juda hamumulak ni si Benjamin, didok si Jakob ma mangusung ragam-ragam ni parbue dohot na hushus na tubu di tano Kanaan i bahen siluana tu raja i, jala.... borhat ma nasida.
***
Tulisan ini adalah sebagian dari isi
Buku Hasudugan Ni Roha
Penasaran dengan kisah-kisah yang lainnya?
Baca Juga Kisah :
- Aek Na Sumar
- Abraham
- Si Abraham Di Tano Kanaan
- Si Josep
- Si Josep Di Tano Misir
- Si Josep Di Jolo Ni Raja Parao
Nb.
Mohon luangkan waktu untuk memberi komentar terhadap isi tulisan, cover buku, atau pendapat saudara/i tentang buku ini. Terima kasih.
Tidak ada komentar:
Posting Komentar