SI JOSEP DI TANO MISIR
1 MUSA 39
1 MUSA 39
A,.... lelengnai asa sahat, ninna si Josep dibagasan rohana. Mansai mohop do rihit na didege ni patna. Tole muse, — hansit patna. A, susanai!....
Alai di na sadari diida si Josep ma torop jabu. A, na sahat ma hami horoha.... Tuani ma! — Disungkun ma tuanna i: ,,Beha amang on do tano Misir?”
,,Olo,” ninna.
Sahat ma nasida tu sada onan, apala nabalga situtu. Lam tu toropna jolma diida, — panuhor dohot panggadis, na pasimpar pasebut di onan i.
Digadis angka tuanna ma barang na niusung ni angka untona, hape.... songon na naeng dohot ibana gadisonna?
Daga.... songon pinahan do hape ibana dibahen. Diarga halak ibana, — dibereng ibana sian jolo dohot sian pudi. A.... jorbutnai! Tung maila situtu iba disi! Aut diboto amanta natuatuai nian namasa tu ahu, ingkon ro ibana paluahon ahu, ninna rohana sibagasan.
,,Ale ompung Debata, asi ma roham di ahu!”.... ninna tangiangna.
Laos tongkin i ma diida si Josep sada hureta natinogutogu ni dua hoda, jala nahinundulan ni sada tuan, mamolus sian onan i.
Si Potipar!.... si Potipar ro tu onan on, ninna natorop, — Didalani si Potipar ma onan i, jala maradian ma ibana di lambung ni si Josep.
,,Beha, adong do hatoban si tuhoron dison?”.... ninna.
,,Adong do rajanami, Apala ipe dolidoli on hubonan hami sian tano Kanaan ala uli ni rupana!”
Ditangkasi tuan nasangap i ma ibana, jala disungkun ma: ,,Sadia argana?....
Dihusiphon halak Midian ima tu nasangap i argana, jala manigor didokma: ,,Ba, denggan! Diahu ma ibana!” Didokma naposona manggararsa, jala rap borhat ma nasida tu jabu ni namora i.
Dung hira-hira satonga taon diula si Josep ulaon napinasahat ni si Potipar tu ibana, diida si Potipar ma burju ni rohana, jala didokma: ,,Ture do huida ulaonmu, dibahen i, olat ni on, homa gabe siramoti jabu on!”
,,Ba,.... mauliate rajanami, ninna si Josep, gabe saut ma ibana induk ni angka naposona.
Lam burju ma antong si Josep mangulahon ulaonna, huhut mangido gogo sian Debata. Manang aha pe diula sai na manjadi do.
Alai sahali.... A, susanai!.... masa ma na jorbut di jabu ni tuanna i. Ala uli ni rupa ni si Josep, lomo ma roha ni jolma ni si Potipar mida ibana.
,,Amang.... uli ni si Josep on, jongginai, sai ninna dibagasan rohana.”
Ia jolma ni si Potipar i, boru na jahat do. Jotjot do dipaotooto nasida hamulianna i, jala didok nasida ma sahali tu si Josep: A,.... rap ma hita paotootohon si Potipar. Tole, — satahi ma hita! Aha dipangido ho sian ahu hulehon pe, ninna. Ai naeng bahenonna si Josep bangunan ni rohana. Jadi dialusi si Josep ma: ,,Ba.... tung olo ma ahu mambahen jea na sai godang tu si Potipar nang tu diringku pe? — Tung olo ma ahu MARDOSA DOMPAK DEBATA? — heama i inang?.... Tung so olo ahu da! Ai sai holan na denggan do dibahen si Potipar i tu ahu, jala Debata do na huhabiari!
Hape.... sai ganup ari diulahi mandok hata naroa i, anggiat di oloi si Josep hatana. Songon ima muse dinasadari, roma ibana tu si Josep huhut mandok: ,,Beha na olo do ho satahi dohot ahu manang ndang?”
Mabiar ma si Josep tutu, laos ditadingkon ma ulosna ditanganna, huhut maporus ibana.
,,A,.... nunga susa!”
Joujou ma boruboru i, jala manigor torop jolma ro.— ,,Ida ma!.... ida ma jungkat ni si Josep on! Naeng paotootoonna do tuanna, umbahen na ro ibana tu ahu. Ba, hutiop ma ulos na ditanganku, alai anggo ibana nunga maporus! A,.... jungkat ni si Josep on!”
Dang dihaporseai nasida boruboru i nian, ai nunga tangkas diboto nasida parangena, alai,.... dihaporseai si Potipar do hata ni jolmana, gabe tarrimas ma ibana jala manigor ditangkup, jala dipasahat ma si Josep tu induk ni hurungan, asa tangkas di jaga.
,,Inangoiamang!.... hansitnai!”....
Dagoiamang!.... marsorinsorin ma tutu arsak ni roha dohot las ni roha di tano on! — Hurimpu naung mulak roha ni Debata dompak ahui, hape.... lam tubagas na do pangunjunan tu ahu dibahen. Pola ingkon tarhurung ahu, soala ni salangku.
Ah.... tahe! hansitnai! Diingot ma tano hagodanganna.... amana.... angka nipina. Songondia do pangalahoni i?....
,,Hupasahat ma daging dohot tondingku tu Debata, na denggan naung hujalo, andorang dilambung ni damang ahu, ba.... saonari pe naroa i pe jaloonku do, ai ido diturpukkon Debata tu ahu. — Lam marpingkir-pingkir ma ibana, lam sonang dihilala, dipambahen ni Debata.
Sorta jala burju do rohana dohot hatana tu na manaruhon sipanganon tu ibana. Dang songon na deba nari, namarsungutsungut manang marhata naroa ibana.
Jadi di nasahali, didok sijaga hurungan ma tu si Josep: ,,Boti ma i.... hupalua ma rante sian tanganmu dohot patmu, jala urupi ma ahu tu joloan on mangharingkothon angka na tarhurung di hurungan on, asal unang mangangkat ho!”
,,Mauliate ma Ompung, ninna si Josep, pos ma roham di ahu, Debata do mangaloas ahu tarhurung, ba ibana pe paluahon ahu sian on!”
Tarboan ma sahali tu hurungan i, dua halak na sangap. Sada si tahu tuak anggur, na sada nari si lompa sagu-sagu ni raja Parao. Parsala do sada sian nadua i, nunga leleng nasida dibagasan hurungan i, alai dang diboto raja i dope manang ise na marsala sian nasida.
Hape di na sahali ro ma si Josep manaruhon sipanganon nasida, gabe di ida ma nasida nadua i, margondok niroha. Jadi didok si Josep ma tu nasida: ,,songon na marsak do hamu ale? aha do arsak ni rohamuna, huroha?”
Iale, amang,.... bege hamuma jolo, ninna.
,,Marnipi do hami nadua naborngin, alai asing be do nipi nami, aut di jabu ni Raja i ma hami nian, ai torop do disi angka na pistar, na mamboto manjujur angka nipi.”
,,Ba.... da saguru di Debata do panjujuron ni nipi? Ua, pajojor hamu ma tu ahu — sai urupan ni Debata do ahu patorangkon lapatan ni nipi i, laho patorangkon tu hamu!”
Ba,.... toho ma i amang! bege hamu ma ninna si Tuak anggur i.
,,Tolu do ranting ni nasangkabona i, angka na martunasi, mengerbang ma bungana, dungi malamun ma parbuena. Huputikhon ma i jala huparoi tu panginumon ni raja i, dungi hulehon ma tu tanganna, laos tarsunggul ma ahu!”
Olo.... nunga lehet nipi mi amang: ai ondo lapatanni: ,,Intap ni tolu ari nari nama ho di hurungan on, jala mulak ma ho tu ulaonmu hinan. Pos ma roham, na ingkon saut na hudok i tuho, ai Debata do paboahon lapatan ni nipimi tu ahu. Alai tahe.... ia dung mulak jala sonang ho mulak tu ulaon mi, sai taringothon ahu tu pinggol ni raja i, da!.... asa dipalua ahu sian hurungan on. Ai na dipangus halak do ahu sian tano hagodanganku, — angkup ni i, — tarhurung pe ahu, dang adong huboto aha salangku.
,,Heama dang ingoton angka namarasi ni roha tu iba? Pos ma roham taringot tusiamang, hutaringothon pe i!”
Jadi dung di bege sintua ni sipauli sagu-sagu, denggan do hape lapatan ni nipi ni donganna, rangka ma rohana paboahon nipina tu si Josep, didokma: ,,Ia nipingku rajanami songon on ma: ,,Huipi ma, huhunti hirang tolu martindi-tindi, marisi sagu-sagu. Ia hirang parginjang i, marisi ragam-ragam ni juada sipanganon ni raja i, napinajadijadi ni angka pangalompa. Hape — huida ma ro angka pidong mamargutisa, ba, ima ujung ni nipingku!”
Dung dibege si Josep hatana i, songon na marsak ma ibana idaon. ,,Sintua ni sipauli sagu-sagu do hape parjahat,” ninna dibagasan rohana. Marlungus ma hosa ni si Josep.... jadi didok ma: ,,Ianggo lapatan ni nipimi amang, songon on do: ,,Intap ni tolu ari on, ho pe haruar ma sian hurungan on, alai.... gantungonna do ho bahenon ni raja i, gabe panganon ni angka pidong ma sibukmu!”
Dung salpu tolu ari jumpang ma ari hatutubu ni raja i, laos toho songon na nidok ni si Josep. Roma oppas mangalap sintua ni silompa sagu-sagu, mamboan ibana tu panggantungan, ai ibana do hape najahat i. Alai anggo sintua ni si tahu tuak anggur mulak ma ibana tu ulaonna hinan.
Hape.... dang diingot ibana bagabaga ni si Josep i. Hirim do roha ni si Josep, ingkon ro ma oppas mangalap ibana, asa malua. Hape.... dang saut.
Dianggukhon si Josep ma tu Debata, gabe lam sonang ma rohana.
***
Tulisan ini adalah sebagian dari isi
Buku Hasudugan Ni Roha
Penasaran dengan kisah-kisah yang lainnya?
Baca Juga Kisah :
Tidak ada komentar:
Posting Komentar