Aek Na Sumar

Post by Admin 09-09-2014

AEK NA SUMAR 
1 MUSA 6

Catatan: Layout di Internet berbeda dengan di Buku

Tak — tagatak — tak  — tagatak!
,,Ba,.... soara ni aha do i?  O,.... soara ni tongkok do hape!”

Bereng  ma! Adong  do sada halak martungkang disi. Nunga matua ibana nian, alai atik pe songoni, — dang moru dope gogona. Ida ma, sai didatdati do na martungkang i, dang mansohot ibana.”

,,A,.... na ringgas ma i! Didok halak, naeng paulionna sada parau na balga situtu.”

,,Dang adong donganna huroha?”
,Adong do nian, alai dang disi nuaeng, ala laho tu harangan mangalap hau.”

Ba,....  ida, —  nunga ro nasida hape!....
Dihallung do sada hau na balga, na ringkot pangkeonna tu parauna i. Nunga godang nian hau pungu disi, alai dang sae dope i huroha; ai dung sahat nasida, angka panarui tusi, manigor mulak do nasida muse laho tu harangan, mangalap hau na deba nari.

Alai ianggo natuatua i, tong do tinggal di partungkangan i. So marnaloja ibana mangalabangi angka papan naung rade hian.

Taktagatak — taktagatak!

,,Ba,.... boasa ma naeng garahionna  api di si?

,,O,.... naeng minum kopi do nasida huroha; ai nunga loja natuatua i tutu!   Alai
tahe, dang kopi hape na dibagasan hudon i, — puli do hape!”
,,Ida ma, dung gurgur puli i, dibuat natuatua i ma pandaisna laho mandaishon puli i tu papan dohot dorpi ni parauna i. Rap didais do sian bagasan dohot sian duru, asa unang masuk aek tu bagasan, ia dung diboan parau i tu tao, didok rohana!”

,,Ba,.... ise ma na boi mangkallung parau nasai balga i tu tao? A,.... dang dipingkiri natuatua i hian huroha; ai nang pe saratus halak manogu parau i, tung na so meret do, ala ni balgana. Ai timbang ma: Tolu lampis bilutna dibahen martinditindi, tarupna pe tung mansai timbo do, dungi parhauna i sude, holan hau na togu jala na dokdok. Asa, — dang tangkas dipingkiri natuatua i hian huroha. Torop do nian na pasingothon ibana, alai dang ditangihon hatanasida. Sai tong do didatdati martungkang, nunga pola martaontaon!’’

Taktagatak —tak —taktagatak!

,,Diboto ho do goar ni natuatua i?”

,,Ba,..... si Noak do goarna, jala goar ni anakna na tolu i: Si Sem, — Si Ham dohot si Japet!

Ia jabu ni si Noak di adui do!  Dilambung ni i do jabu ni anakna na tolu i. Jotjot do ro angka jolma nasida, maningkir ulaon i alani ringkotna. Dipabotohon Debata do tu nasida manang aha na naeng masa  uhum tu hajolmaon, alani  dosa ni jolma i.   Ima AEK NA SUMAR.

,,Amang,..... jorbutnai,” atik olo ma nian jolma i paubahon rohanasida be, alai tahe na nidok ni Debata ingkon saut.
Debata sandiri do manuru nasida mambahen Parau i bahen dalam haluaon ni angka na porsea diharoro ni AEK NA SUMAR i.

Lam tu jahatna do uju i roha ni halak, apala di tingki ni si Noak.

Dang diingot nasida be angka na denggan na binahen ni Debata tu nasida, ai holan na jat nama tubutubu ni roha nasida sian angka dakdanak ro di angka namatua.

 Da patut ma ro rimas ni Debata dompak nasida? Pola disolsoli Debata rohana ala ditompa ibana jolma nahinan di tano on.

Dohot do halak natorop ro maningkir ulaon ni si Noak, alai diparengkeli do nasida alani i. Hape,.... naeng ripashonon ni Debata nama jolma i marhitehite aek na Sumar.  Di pasingot si Noak do nian na torop i asa dihaporseai nasida  taringot uhum na naeng masa, alai  neang do roha nasida, jala  laos mengkelengkel do nasida molo ditogihon si Noak natorop i dohot tu bagas Parau i. Alai anggo si Noak  pos situtu do rohana di Debata, jala,.... nunga jonok nabinuhul ni Debata. Hata ni Debata ingkot saut!

Alai sahali.... bereng ma! A,.... longang roha disi, — sude angka binatang ro di angka pinahan sian desa na ualu manopot parau ni si Noak i. So pola adong  na manjou manang na mandasdas nasida. Sian ganup mansam na so ganjing panganon — ro do sapasang be, i ma sada tunggal dohot sada boruboru; alai ia sian na ganjing panganon pitu pasang do na ro, jala sudena i  dipamasuk si Noak tu parauna i.

Inang!.... Ragam ni angka na ro i; Gaja, herek, babiat, singa, gompul, monsi, horbo, lombu dohot lan na asing, dang hagoaran tahe, — dibahen  toropna. Angka pidong pe, ro do, ida ma.... Angka na balga ro di na metmet, marpasang do nasida ro sian ganup mansam, homar tu na tinonahon ni Debata tu si Noak i. Sudena i, masuk do tu Parau ni si Noak i.

Dipatuduhon si Noak ma ingananna be. Sipanganon ni i pe, nunga diparade si Noak hian rap dohot angka anakna i; ai aut na metmet dibahen,— tung naso siat do sude.

Asa dung dipamasuk si Noak i sude, bongotma nang ibana dohot jolmana i, songoni ma  nang angka anakna na tolu i dohot pardihutanasida be.

Jala dung bongot nasida be,.... dihinsu Debata ma pintu ni parau i sian duru.

,,Ba, ba — ba,ba!.... songon na naeng ro udan!”  ninna sahalak mandok donganna.

,,A.... mauliate ma da, molo tung ro; ai nunga tung pir tano i nuaeng! Anggiat ma gogo sahali on, asa boi ulaon tano i. Asi ma rohana!”

,,Tutu, tung mansai por do udan sadari on,’’ ninna halak. ,,Tole, sai didatdati ma nian!”

Marsogotna i pe suang songoni do! Patoluna.... paopatna.... sahat rodi....

,,Ba.... lelengna i, — dang dung hea dope ni ingot songoni! So da tung na tutu na nidok ni si Noak uju i?

,,A,.... dang pola!.... pos ma roham, —siang do i marsogot  manang haduan!”
Hape,.... lam tu gogona do udan i di ari palimahon, paonomhon, sahat ro di ari pa....

,,Marbuhalbuhal ma sude angka mual sian lung i mansai godang. Mungkap ma dohot angka pandiloan ni langit!”

,,Inangoi amang! Tudia nama hita?.... Tudia nama hita dohot ianakkonta?.... Tole, laho ma hita tu dolok!.... Tole ma hita manopot parau ni si Noak,” ninna na deba.

,,Didia do tahe parauna i? Dago,.... ida ma, nunga dihindat aek parau i sian tano i. Nunga pola dao! Dagoi amang!.... bereng ma!”

Hansitnai!.... Dangolnai!....

Solu so adong! Aut na porsea hian ma nian hita uju i di hata ni si Noak! Tudia nama hita!.... Tudia nama hita?

Lam ganda — lam naek — lan tu timbona ma aek i! Haluaon so adong! Dolok na timbo, dang haeahan be! ,,Oe.... Lonong nama hita! Inang!.... lonong nama ianakkonta dibagasan aek on,”  — ima jou jou ni angka amaama, dohot inaina sian dele ni rohana.

Maporus ma na deba sian dolok na sada tu dolok na sada, mangalullui inganan na tumimbo. — ,,Dagoi amang!.... Nunga ro aek!.... Tudia nama hita!.... Tudia nama hita!”

,,Ompung Debata!.... Mago ma hami, ia so adong be asi ni roham di hami! Jora ma hami!.... Jora ma tutu hami! Ompung!.... Ompung Debata; asi ma roham! Asi ma roham! Jora!.... Jora situtu ma hami!”

Hape,.... aek i, — lam mangalantap! Lam naek, — naek, — ro di punsu ni langit!

Oe,.... hansitnai! Marmumbangan ma jolma angka na mangalullui sitopotonna nian, hape.... lonong, mogap runsur tu doldolan ni aek. Habang ma angka pidong mangalullui hasonggopanna.

Mangangguhi dohot angka pinahan ro di nasa na manjirir di liat tano on. Luhut do mate!  

Hansitnai!.... Jorbutnai!....
Aha do na meapeap di atas ni aek i, na sai bolon, — so pola lonong? Ro do alogo dohot galumbang na sajabu balgana.... so diterge, ise do nampunasa?”

,,Parau ni si Noak do i!”
,,A,.... tuani dihaporseai si Noak hata ni Debata! Ai horas do ibana rap dohot angka na di ibana i!
Dung mate saluhut na di tano on, dipolpol Debata ma angka mual na marbugo hinan, — dipasuang ma udan na martipotipo, jala lam moru ma aek i.

Bommm....

,,Aha doi?’’
Ba, nunga sangkot hape parau i di sada dolok na margoar Ararat. A,.... mauliate ma, — ninna si Noak, mandok anakna. Tabereng ma jolo sian pandiloan, manang nang tutu moru aek i. Oooo,.... nunga tutu; ai tarida do hape angka punsu ni dolok. Ba, niuji ma jolo pinalua sada Darapati, asa binoto manang nang tutu mahiang tano i!

,,Bo, bo, bo, bo,.... dang dope huroha mahiang; ai nunga mulak, dang adong huroha hasonggopanna!”

,,A,.... tapaima jolo pitu borngin nari, asa pinalua darapati muse!”

,,Beha do, — nunga mamungka mahiang?”

,,Nunga!.... ai ida ma, diusung darapati i do sada bulung ni hau na rata di tuktukna.”

Marlas ni roha ma si Noak rap dohot angka donganna, ala dipalua Debata nasida sian parmaraan bolon. Ruar ma nasida tu toru huhut ma dipungka pajongjongkon sada langgatan, bahen pamelean tu Debata.

Hita pe naeng ma  malua sian parmaraan bolon na ingkon masa sogot. Manang ise na mangkaporseai hata ni Debata, — malua do.

Sada tanda dibahen Debata tu si Noak, paboahon holong ni rohana tu nasa na mangolu.

Dia do tanda i?

Halibutongan!

Sada nari tanda na umpaltak dibahen Debata tu hita, paboahon holong ni rohana tu nasa jolma na tinompa. Tanda dia do i?

Hau pinorsilang ni TUHAN JESUS, na di dolok  Golgata!

                          ***



Untuk mendapatkan buku secara lengkap silahkan klik pada form Pemesanan